Në kuadër të 16 Ditëve të Aktivizimit kundër dhunës me Bazë Gjinore, Shoqata Gender, Paqe e Siguri- ish Shoqata e Grave me Probleme Sociale, “Rrjeti Për Fuqizimin e Grave Shqiptare” AWEN-Albanian Women Empowerment Network(AWEN) me mbështetjen e Embassy of Sweden in Tirana, zhvilloi ditën e sotme takimin hapës që përkon me Ditën Ndërkombëtare për Eleminimin e Dhunës Kundër Grave.

Ky takim u mbajt në Sheshin “Liria” Durrës dhe në vijim do të zhvendoset në Gjimnazet e qytetit të Durrësit.

Qëllimi i këtij takimi ishte rritja e ndërgjegjësimit të të rinjve, kryesisht burra dhe djem mbi fenomenin e dhunës ndaj grave dhe vajzave si dhe nxitjen e ndërmarrjes së veprimeve të përbashkëta për parandalimin e këtij fenomeni.

Motoja e fushatës së këtij viti është “Bëje botën portokalli! Të ndalim dhunën ndaj grave tani! Ngjyra portokalli, e ndritshme dhe optimiste, simbolizon një të ardhme më të mirë, pa praninë e fenomenit të dhunës, që në vetvetë është shkelje e të drejtave të njeriut, që prek më shumë se 1 në 3 gra dhe vajza në mbarë botën.

Ngjarjet e vazhdueshme të dhunës në familje dhe më tej dhe në shoqëri ngrejnë një ‘këmbanë alarmi” të fortë për të gjithë ata që punojnë drejtpërdrejt me viktimat e dhunës në familje.

Reagimi ynë është thelbësor për t’ju përcjellë measazhin e duhur atyre që janë duke përjetuar dhunë që nuk mund dhe nuk duhet të heshtin më.

#BejeBotenPortokalli

#TeNdalimDhunenNdajGraveTani